samkomulag þingflokksformanna við þinglok Virðulegi forseti. Í aprílmánuði var undirritað samkomulag milli þingflokksformanna er varðaði lög um stjórn fiskveiða sem sneri að því að heimiluð voru til viðbótar 2.700 tonn í strandveiðar en í staðinn yrði ekki hróflað við línuívilnun eða rækju- og skelbótum. Það var skrifað undir sérstakt samkomulag af þessu tilefni. Með reglugerðarsetningu núna 14. september fer hæstv. innviðaráðherra algerlega gegn þessu samkomulagi. Samkomulagið miðaði að því að það yrði ekki hróflað við rækju- og skelbótum eða línuívilnun fyrr en að höfðu samráði við einn stjórnarþingmann og einn stjórnarandstæðing í tengslum við frumvarpsdrög að nýrri uppstokkun á pottakerfinu sem ráðherra ætlaði að koma með í haust. Með reglugerðarsetningunni breytir hann algjörlega þeim forsendum sem samningurinn kveður á um. Ég velti fyrir mér, virðulegi forseti, af því að traust er gríðarlega mikilvægt hér á Alþingi: Hvað eigum við hér í stjórnarandstöðunni að gera þegar samningar þessa eðlis eru ekki efndir, skriflegir samningar, og ráðherra ætlar sér hreinlega ekki að gera neinar ráðstafanir til að breyta þessu máli?