samkomulag þingflokksformanna við þinglok Frú forseti. Ég vil taka undir það sem hv. þingflokksformenn Sjálfstæðisflokks og Framsóknarflokks hafa sagt hér á undan. Þetta er auðvitað alveg ótrúleg staða sem er að teiknast upp hérna. Í eina tíð var hægt að semja munnlega um frágang og framgang mála. Síðan hefur þurft að gera það skriflega á seinni tímum en nú er skyndilega komin upp sú staða að skriflegt samkomulag þingflokksformanna um fyrirkomulag og framgang til lúkningar máls heldur ekki. Það er auðvitað þannig að virðulegur forseti verður að stíga inn í þetta svo eitthvert skikk geti verið á störfum í þinginu undir lok þings í desember annars vegar og síðan þegar líður að vori og sumri eftir atvikum. Þetta er bara grafalvarlegt mál, að ráðherrar Flokks fólksins í þessu tilviki telji það léttvægt að brjóta samkomulag sem þarna var undirritað og þekki ég aðeins til þess hvernig það atvikaðist. Enn galnara verður þetta þegar liggur fyrir að samkomulagið var skriflegt. Svo fara menn undan í flæmingi og með skætingi. Þetta getur ekki verið staðan í þinginu. Virðulegur forseti verður að stíga inn í þetta.