samkomulag þingflokksformanna við þinglok Virðulegur forseti. Ég vil taka undir með hv. þingmönnum sem hafa komið hér á undan. Á hvaða stað erum við komin þegar skriflegir samningar halda ekki? Þetta eru ekki munnlegir lokasamningar, þetta eru skriflegir samningar. Svo bara þóknast ráðherrum að fara ekki eftir skriflegum samningum sem er búið að gera hér á milli flokka, stjórnar og stjórnarandstöðu. Er það orðið þannig, virðulegur forseti, að við þinglok þurfi hér að fara að mæta með lögfræðinga eða þarf ríkislögmaður eða umboðsmaður Alþingis að vera viðstaddur til að votta? Hvert erum við komin þegar það er orðið eitthvert geðþóttaákvörðunarvald viðkomandi ráðherra hvort hann virði þá skriflegu samninga sem eru gerðir hér á milli flokka? Við erum komin á vondan stað. Virðulegur forseti. Ég treysti því að virðulegur forseti grípi hér inn í og leiðrétti þetta mál strax.