samkomulag þingflokksformanna við þinglok Frú forseti. Það er greinilegt að þingmenn stjórnarandstöðunnar fara hér mikinn vegna máls sem mun verða á dagskrá atvinnuveganefndar innan tíðar. Það er búið að ákveða að það verði haldinn opinn fundur þar sem innviðaráðherra fer yfir málið og ég átta mig ekki alveg á þessum æsingi yfir málinu þegar það er ljóst að það verður farið yfir það á opnum fundi. Hvers vegna er verið að gera það hér undir fundarstjórn forseta? Það er illskiljanlegt. Ef skriflega samkomulagið er lesið þá er nokkuð ljóst að reglugerðin sem var sett er alveg innan samkomulagsins. Mögulega hefði ráðherra átt að hafa samráð áður en reglugerðin var sett, en eins og ég sagði fyrr í ræðu minni er málið á dagskrá eða mun vera á dagskrá atvinnuveganefndar þannig að ég bið félaga mína, hv. þingmenn í stjórnarandstöðunni, að anda með nefinu. Þeir munu fá að ræða við ráðherra og fara yfir málið og það mun verða skýrt.