samkomulag þingflokksformanna við þinglok Virðulegi forseti. Fyrir þá sem hlusta á þetta og hugsa: Er alvanalegt að gera skrifleg samkomulög? þá hefur það alla vega ekki verið þannig. Hér í þessu húsi hefur almenna reglan verið sú að það þurfi ekki að skrifa svona hluti niður vegna þess að menn geta treyst því sem sagt er. Það er almenna reglan. Það hafa verið undantekningar en þær eru mjög fáar. Ef af einhverjum ástæðum er komið eitthvert vantraust þá skrifa menn niður samkomulag og það er bara mjög sjaldan sem það gerist. En ef við erum komin á þann stað að það er ekki hægt að treysta því sem er skrifað, hvernig ætla menn þá að vinna hér áfram? Það dugar ekki, með fullri virðingu, að halda fundi í nefndum. Hvernig eigum við að klára þinglok þegar menn semja um hluti, og nú hafa flestir sem eru hér verið beggja vegna borðs, ef það er ekki hægt að treysta skriflegum samningum?