samkomulag þingflokksformanna við þinglok Frú forseti. Það er auðvitað þannig að orð hv. þm. Sigurjóns Þórðarsonar í þessari umræðu eru sérstök, svo vægt sé til orða tekið. En það verður að halda því til haga varðandi samkomulagið sem var gert í apríl síðastliðnum að stjórnarandstaðan stóð við sitt. Það eru stjórnarflokkarnir sem eru ekki að standa við sitt og ég bara óska hv. þingflokksformanni Samfylkingarinnar, sem fær það verkefni að leiða þinglok til lykta í desember og síðan í vor eða sumar, alls hins besta því að staðan hvað slík samtöl varðar er auðvitað gjörbreytt ef þetta verður niðurstaðan. Það er auðvitað þannig að ráðherra er kolrangstæður í málinu en stjórnarflokkarnir, með aðstoð virðulegs forseta, verða auðvitað að finna einhverja leið til að vinda ofan af þessu rugli sem hér blasir við okkur. Að öðrum kosti er hér allt breytt og ég er því miður ekki að orða þetta með þessum hætti í fyrsta skipti á þessu kjörtímabili. Þetta hefur verið æðisérstakt á köflum. En ef menn ætla að koma sér á þann stað að skriflegt samkomulag, skriflegir samningar, haldi ekki þá verð ég bara að biðja um aðstoð virðulegs forseta við að finna með hvaða hætti við í stjórnarandstöðunni eigum að geta treyst stjórnarflokkunum aftur.