samkomulag þingflokksformanna við þinglok Virðulegur forseti. Ég held að ég verði að koma upp og leiðrétta hér hv. félaga mína í stjórnarandstöðunni. Ég held að það sem við erum ekki að átta okkur á, eins og hefur komið fram í ræðum hv. þingmanna, bæði Guðmundar Ara Sigurjónssonar og Sigurjóns Þórðarsonar, er að þetta snýst hvorki um staðreyndir né sannleika. Þetta snýst um upplifun. Við erum komin í heim upplifunarstjórnmála. Ég held að það væri ágætt upp á framhaldið að spyrja: Hvernig í ósköpunum, virðulegur forseti, eigum við í stjórnarandstöðu í framhaldinu að semja við upplifunarríkisstjórn þar sem upplifunarstjórnmál eru það sem ræður för? Það væri ágætt að fá fram, virðulegur forseti, með hvaða hætti við getum í rauninni gert samninga við slíka hæstv. ríkisstjórn þar sem málið snýst ekki um staðreyndir né sannleika eða framkvæmd heldur upplifun hvers og eins. Það væri athyglisvert, virðulegur forseti, að fá leiðbeiningar um það fyrir okkur í stjórnarandstöðunni.