samkomulag þingflokksformanna við þinglok Virðulegur forseti. Vegna ummæla síðasta ræðumanns, hv. þm. Guðmundar Ara Sigurjónssonar, þingflokksformanns Samfylkingarinnar, þá hlýt ég að kalla eftir því að hann komi hér aftur upp og útskýri hvað hann átti við með vísun í að munnleg samkomulög þingflokksformanna hefðu verið brotin hér. Mér finnst það ómaklegt að koma hér upp í ræðustól Alþingis og vísa með óljósum hætti til þess að menn hafi gengið á bak orða sinna í munnlegum samkomulögum í annars ágætu samstarfi sem þingflokksformenn hafa átt á þessu kjörtímabili saman. Ég hlýt að kalla eftir því að hann geri grein fyrir þessum ummælum því að ég kannast ekki við slíkt af hálfu stjórnarandstöðunnar.