fyrirhuguð sameining lögregluembætta Virðulegur forseti. Mig langar að beina orðum mínum til hæstv. dómsmálaráðherra eftir kjördæmaviku þar sem við fórum um Norðvesturkjördæmi og töluðum við sveitarstjórnarfulltrúann okkar þar ásamt íbúum. Það var alveg ljóst að þar voru miklar áhyggjur af fyrirhugaðri sameiningu lögregluembættanna. Af hverju er hræðslan? Jú, hún er til komin af mörgum þáttum. Menn hafa áhyggjur af minni löggæslu, lægra öryggisstigi og lakari þjónustu. En sporin hræða líka. Við höfum séð sameiningu heilbrigðisstofnana þar sem hefur fækkað á landsbyggðinni. Við vitum ekki hvernig mál heilbrigðiseftirlitanna endar. Við höfum séð fækkun í vinnueftirliti. Það átti að gera atlögu og var gerð atlaga að framhaldsskólunum sem var sem betur fer fallið frá. Við vitum ekki alveg hvernig sameining sýslumanna mun fara en inni í efnahags- og viðskiptanefnd er nú tillaga eða fyrir liggur frumvarp um að færa innheimtu frá sýslumönnum til Skattsins. Árið 2015 voru lögregluumdæmin sameinuð í þeirri mynd sem þau eru í dag. Ef við skoðum dæmin t.d. frá Húsavík, Dalvík, Ólafsfirði, Siglufirði, Snæfellsnesi og víðar um landið sjáum við að það hefur orðið fækkun og samþjöppun á lögreglumönnum. Lögreglumennirnir sem voru á þessum smærri stöðum hafa færst inn á stærri staðina. Því er spurning mín til hæstv. ráðherra þessi: Hvernig ætlar ráðherra að tryggja það í lagasetningunni að sá fjöldi lögreglumanna sem nú er staðsettur í hinum dreifðu byggðum landsins haldist að lágmarki óbreyttur þar sem þeir eru staðsettir í dag?