frumvarp til laga um breytingu á húsaleigulögum Herra forseti. Viðreisn, a.m.k. í orði og fyrir kosningar, skilgreinir sig sem frjálslyndan hægri flokk sem trúir á lægri skatta, virðingu fyrir eignarréttinum og trú á markaðinn. Þegar áherslumál ríkisstjórnarinnar frá Flokki fólksins koma hér inn í þingsal, hvort sem það er vísitölutenging bóta, leigubremsa eða önnur inngrip í eignarrétt fólks, þá fer Viðreisn í felur og þingmenn læðast hér um gangana og vilja helst ekkert af málinu vita. Nú var 1. umræða um leigubremsu að klárast í gær og það kom engum á óvart að enginn úr flokki hæstv. utanríkisráðherra tók þátt í þeim umræðum. Um þetta frumvarp hefur m.a. framkvæmdastjóri Samtaka iðnaðarins og fyrrum varaformaður og ráðherra Viðreisnar, Þorsteinn Víglundsson, sagt að leigubremsa muni draga úr framboði á húsnæði, verða til þess að fækka ótímabundnum leigusamningum og fjölga verðtryggðum leigusamningum. Seðlabankastjóri gekk jafnvel skrefinu lengra og sagði, með leyfi forseta, að þetta væru algerlega röng viðbrögð sem kæmu leigjendum verst. Hann kallar frumvarpið heimskulegt og að allir hagfræðingar eigi að vita að þetta virkar ekki. Stefna Viðreisnar frá landsþingi 2025 segir, með leyfi forseta, að „markaðslausnir skulu ávallt nýttar þar sem þær nýtast best“. Ávallt. Þetta er ekki markaðslausn, þetta er handstýring, virðulegur forseti. Mig langar því að spyrja hæstv. utanríkisráðherra, sem er einnig formaður Viðreisnar: Styður hæstv. ráðherra þetta mál heils hugar þrátt fyrir að það gangi gegn eignarrétti og samningsfrelsi fólks og gangi í berhögg við stefnu Viðreisnar? Styður hún að halda áfram með þetta mál eftir ummæli fyrrverandi varaformanns Viðreisnar og seðlabankastjóra?