frumvarp til laga um breytingu á húsaleigulögum Virðulegur forseti. Hæstv. ráðherra kemur hér upp og svarar engu. Rantar hér um Sjálfstæðisflokkinn og verk Sjálfstæðisflokksins og það er eiginlega alveg sama um hvað hæstv. ráðherra er spurður að þá er bara farið í það að ráðast á Sjálfstæðisflokkinn. En það er samt svolítið merkilegt — hæstv. ráðherra, nú er ég með orðið — að það skín í gegn að hæstv. ráðherra og formaður Viðreisnar er andvígur þessu máli. Það skín í gegn og það sjá allir hvað þetta mál er erfitt fyrir Viðreisn. Við sáum það sem vorum í umræðunni hvað þetta mál er erfitt fyrir þingmenn Viðreisnar og ráðherra Viðreisnar því þegar rökin þrjóta tekur skætingurinn við. Það er bara þannig, virðulegur forseti. Og þegar það er sagt að hér sé verið að bjarga vinnumarkaðnum — virðulegur forseti, þetta er sex mánaða gamalt mál. Það er langt síðan hæstv. félagsmálaráðherra tilkynnti að hann ætlaði að boða þetta mál en svo er búið að setja þetta mál núna inn í framlengingu kjarasamninga. Mig langar að spyrja hæstv. ráðherra og kannski ef hún gæti nú einu sinni svarað án þess að vera með skæting: Styður hæstv. ráðherra og finnst henni það virkilega ábyrgt miðað við þau varnaðarorð sem eru búin að koma um þetta frumvarp, bæði frá seðlabankastjóra, og það var ekkert hægt að misskilja orð seðlabankastjóra, og fyrrverandi varaformanni Viðreisnar, styður hún að þetta mál haldi áfram og finnst henni ekki óábyrgt að það sé búið að setja þetta inn í framlengingu kjarasamninga miðað við þau varnaðarorð sem búið er að hafa uppi? Forseti minnir á að virða tímamörkin. Ræðutíminn er eingöngu ein mínúta í síðari umferð.