gjaldtaka af erlendum ferðamönnum Frú forseti. Ég þakka hæstv. ráðherra svarið. Staðreyndin er hins vegar sú að þessari málsvörn sem hæstv. ráðherra fór yfir hefur verið hafnað af Evrópudómstólnum í því máli sem ég vísaði til í fyrri fyrirspurn minni. Hæstv. ráðherra nefnir hér ferðamannastaði eins og Dubrovnik, Madeira og annað þar sem slík gjaldtaka þekkist. Hún er allt annars eðlis, í Dubrovnik greiða sumir Króatar fyrir aðganginn en aðrir ekki. Það er bundið við íbúana akkúrat á því tiltekna svæði, allt annars eðlis en hér um ræðir. Allt verður þetta svolítið kauðslegt og minnir um margt á landamæraeftirlitið á Keflavíkurflugvelli í gamla daga. Það dugði bara að segja: Heyrðu, ég er Íslendingur. Í vikunni mælti utanríkisráðherra fyrir frumvarpi sínu um bókun 35 og lagði út frá svokölluðu fæðingarorlofsmáli þar sem ung móðir fór á mis við réttindi sökum mistaka við innleiðingu EES-reglna. Náttúru- og innviðagjald hæstv. ráðherra er hins vegar allt annars eðlis. Það virðist vera óumdeilt í frumvarpinu að það feli í sér þessa óbeinu mismunun á grundvelli ríkisfangs og ætlaðar réttlætingarástæður taka eingöngu til almennrar þarfar á gjaldtöku en ekki sjálfrar mismununarinnar. Ég spyr því hæstv. ráðherra: Hvernig fer þetta tvennt saman og er málið ekki ögrun við fjórfrelsi EES-samningsins?