búvörusamningar og rekstrarskilyrði landbúnaðar Forseti. Ég þakka hv. þingmanni fyrir fyrirspurnina. Þrátt fyrir að hún beinist að þingmáli annars ráðherra ætla ég bara að taka þátt í þessu samtali. — Já, af því að hv. þingmaður gefur sér þau fyrirheit að þetta sé atriði í búvörusamningunum, sem það er ekki. Jurtaostamálið er ekki atriði þar og er ekki neitt tengt þeim, ekki loforð þar og ekki tilgreint í búvörusamningunum. En kannski fyrst að stöðunni þar, af því að mér fannst hv. þingmaður nefna þær samningaviðræður. Þar er þríhliða samningur í gangi: Það er atvinnuvegaráðuneytið, það er fjármálaráðuneytið, sem er samningsaðilinn við Bændasamtökin, og Bændasamtökin eða -forystan fyrir hönd bænda. Þar er fundaröð í gangi og ég held að ég fari rétt með það að í gær var fundur. Það eru vikulegir fundir núna þar sem málefnin eru rædd hvert í sínum kafla og það gengur bara vel, að mér best vitandi. Varðandi þetta tiltekna mál er fjármálaráðherra að taka á mjög afmörkuðu álitaefni um tollflokkun á tiltekinni blöndu mjólkurosts og jurtafitu. Það er ekki verið að ræða almenna tollvernd landbúnaðarafurða. Hún stendur áfram. Um hana verður rætt í búvörusamningunum. Þarna er verið að taka á, fjármálaráðherra sem er í samskiptum við Alþjóðatollastofnunina, held ég að hún heiti, annars vegar og síðan ESA varðandi þetta mál, metur í þeim samtölum heildarhagsmuni okkar þegar kemur almennt að alþjóðaviðskiptum. Þetta er, eins og ég skil málið, niðurstaða hans; að leggja þetta mál fram í samráð. Það er þar, að ég held. En þetta er svona stóra málið. Þetta tiltekna, afmarkaða álitaefni, um tollflokkun, er ekki hluti af búvörusamningum.