búvörusamningar og rekstrarskilyrði landbúnaðar Frú forseti. Ég þakka hæstv. ráðherra svarið þó að í huga mínum standi fyrst og fremst eftir: Ja hérna. Það er vont ef bændur landsins finna sig í þeirri stöðu að geta ekki treyst yfirlýsingu atvinnuvegaráðherra. Hæstv. ráðherra verður þá að útskýra hvað fólst í yfirlýsingunni frá 25. febrúar 2025 um að niðurstaða af samtali hennar við fjármálaráðherra væri að láta af áformum um þetta, eiga samtal og samráð við bændur áður en haldið væri áfram. Þetta samtal og samráð hefur ekki átt sér stað. Við erum á sama stað og í málinu sem var rætt hér í fundarstjórn við upphaf þingfundar þar sem ráðherra telur bara allt annað felast í því sem yfirlýsing þessi leiddi fram, rétt eins og innviðaráðherra gagnvart 5,3% pottinum. Þetta er auðvitað alveg ótrúleg staða sem er að teiknast upp ef hvorki stjórnarandstaða í því máli sem var rætt hér fyrr í dag né heldur bændur og Bændasamtökin geta treyst því sem frá ráðherra málaflokksins kemur. Ég vil bara biðja virðulegan hæstv. ráðherra að útskýra hvað það var að mati ráðherra sem fólst í yfirlýsingu hennar frá 21. febrúar árið 2025 um að niðurstaða af samtali hennar við fjármálaráðherra væri að láta af áformum, eiga samtal og samráð við bændur áður en haldið væri áfram.