áhrif af hækkunum á sköttum og gjöldum Frú forseti. Ég þakka hv. þingmanni fyrir þessa fyrirspurn. Ég hef ekki farið yfir nýja samantekt eða reiknivél Framsóknarflokksins varðandi útgjaldaauka. Hins vegar hefur verið mjög rík áhersla í þeim málaflokkum sem við erum með í mínu ráðuneyti sem snúa að félagsmálum einna helst, barnafjölskyldum í kringum Fæðingarorlofssjóð og fleiri þætti. Við höfum verið að gera mjög margvíslegar breytingar, ef við tökum bara fæðingarorlofskerfið, margar mjög jákvæðar breytingar sem snúa að réttlæti og bættum kjörum foreldra þar. Það þýðir ekki að við séum hætt að vinna að bættum kjörum þar. Spurningin er að vísu varðandi fjárlögin og gjaldahækkanir. Það hillir nú í samkomulag á vinnumarkaði þar sem við erum að endurskoða þessi gjöld samhliða friði á vinnumarkaði. Væntanlega þarf þá hv. þingmaður og hans flokkur að endursetja það inn í reiknivélina. Stóra málið hjá okkur í ráðuneytinu er núna að leita allra leiða til að ná niður stærsta kostnaði hverrar fjölskyldu, sem er húsnæði, bæði í formi réttarbóta á leigumarkaði og í formi sérstakra aðgerða til þess að auka stórlega framboð á hagkvæmu húsnæði sem verða væntanlega kynntar fljótlega. Við erum að fara í gegn með og erum að kynna stórfellda einföldun á byggingarreglugerð til að hægt sé að hraða uppbyggingu og fyrstu drög að breytingum á skipulagslögum eru komin í samráðsgátt. Byggingarreglugerð hefur þegar verið kynnt. Allt er þetta til þess að tala inn í lægri verðbólgu og lægri vexti sem ég held að við séum öll sammála um að sé mesta kjarabótin sem hægt er að lenda. Endurskoðun kjarasamninga er auðvitað stór þáttur í því og það verður gaman að kynna þær aðgerðir þegar þær verða gerðar opinberar.