áhrif af hækkunum á sköttum og gjöldum Frú forseti. Ég verð svo sem að segja að mér kemur svar hæstv. ráðherra í sjálfu sér ekkert á óvart, að það hafi ekki verið búið að reikna eða horfa á heildarmyndina, hvernig hlutföllin myndu líta út eftir þessar aðgerðir. En gott og vel. Það er ekkert mál fyrir okkur í Framsókn að endurstilla reiknivélina og breyta forsendum. Staðan er bara eins og hún er í dag og við þurfum að horfast í augu við þær staðreyndir sem við erum að vinna með núna. Þær breytingar sem hugsanlega gætu orðið á fjárlagafrumvarpinu verða væntanlega í lok desember þegar við klárum fjárlögin. En það er mjög mikilvægt að hafa það í huga að bara þær hækkanir sem boðaðar eru í fjárlagafrumvarpinu þýða að það þyrfti rétt tæplega 4% launahækkun hjá þessu fólki sem ég nefndi í mínu fyrra dæmi til þess að ráða við þessa hækkun. Laun samtals hjá þessu unga pari þurfa að hækka um 55.000 kr. á mánuði til að ráða við þessa hækkun, þó að ég hafi talað um fyrir utan skatta. Þannig að það er mjög mikilvægt í þessu ljósi, frú forseti, að ráðherra fari í það og jafnvel leiti liðsinnis okkar í Framsókn og fái að kíkja í reiknivélina vegna þess að hún er ansi góð og þar eru margar góðar breytur sem hægt er að skoða.