áhrif af hækkunum á sköttum og gjöldum Frú forseti. Ég þakka hv. þingmanni fyrir síðari spurningu eða brýningu. Já, ég skal verða við hans ósk og kynna mér betur reiknivélina. Það hefur auðvitað margt gott verið gert, mörg góð vinna sem hefur verið unnin þó að það sé ekki endilega tengt þessari ríkisstjórn eða fyrri eða öðrum. Við höfum lagt á okkur vinnu t.d. varðandi húsnæðismálin, sem er stærsti einstaki kjaraliður hvers heimilis, við að leita fyrirmynda og leiða sem hafa gengið vel. Ég get t.d. nefnt starfshópinn sem á að skila af sér núna fyrir lok mars sem er að vinna tillögur að nýju húsnæðislánakerfi. Þar var m.a. stuðst við vinnu sem fyrri ríkisstjórn vann undir forystu Framsóknarflokksins. Við fögnum öllum hugmyndum og tillögum, sama hvaðan þær koma. En í grunninn þá erum við að vinna að mjög fjölbreyttum aðgerðum eins og þingmálaskráin okkar gefur sterklega til kynna og sömuleiðis líka að aðgerðum stjórnvalda sem koma inn í kjarasamninga. Það verða raunverulegar aðgerðir sem munu skipta raunverulegu máli, sérstaklega þegar kemur að húsnæðiskostnaði og uppbyggingu í almenna íbúðakerfinu.