húsnæðismál Listaháskóla Íslands.
Virðulegi forseti. Mig langar að spyrja hæstv. ráðherra um framtíðarsýn hans varðandi húsnæðismál Listaháskóla Íslands. Listaháskólinn er ung stofnun og hefur verið úti um alla borg, er nú eftir því sem mér telst til á þremur stöðum, þ.e. í Laugarnesinu, Þverholti og síðan á Sölvhólsgötu. Fyrir lágu miklar áætlanir eins og við munum öll um uppbyggingu við Laugaveg og síðan varð hér efnahagshrun. Ég tel mig því bera ákveðna ábyrgð á stöðu mála hjá Listaháskólanum, ekki á efnahagshruninu en því að ekki varð úr byggingarframkvæmdinni. Þetta er eitt af því sem var skorið niður á þeim tíma.
Það breytir því ekki að ég hef verið áhugasöm um að koma megi húsnæðismálum Listaháskólans fram á veg. Eitt af því sem talsmenn skólans töluðu mjög fyrir var að það væri að minnsta kosti mikilvægt að átta sig á því hver framtíðarsýn stjórnvalda væri. Sjálf taldi ég uppbygginguna við Laugaveg afskaplega dýra og ekki endilega mjög hentuga fyrir utan sjónarmið í skipulagsmálum. Það sem var ákveðið að gera var að kanna sérstaklega tvo staði. Ég vitna til þess í þessari fyrirspurn, þ.e. í Laugarnesið annars vegar og hins vegar Sölvhólsgötureitinn. Settur var niður starfshópur mennta- og menningarmálaráðuneytis, Reykjavíkurborgar og Listaháskólans til að meta sérstaklega þessa tvo kosti. Laugarnesið þekkjum við, þar er meðal annars myndlistardeild skólans til húsa í gömlu sláturhúsi. Sú staðsetning hefur kosti og galla.
Sölvhólsgötureiturinn hefur líka sína kosti og galla. Ég ætla bara að segja fyrir mig persónulega, svo enginn gangi gruflandi að því, að ég hefði talið það mjög spennandi staðsetningu fyrir Listaháskóla Íslands út frá skipulagi að hafa skólann í jaðri miðborgarinnar, getum við sagt, á reit sem er ekki mjög spennandi núna. Þar voru hins vegar fyrirhugaðar stjórnarráðsbyggingar sem mér sem þingmanni Reykjavíkur finnst ekkert sérstaklega spennandi fyrir þróun miðborgarinnar. Það er heppilegt að hæstv. ráðherra er líka þingmaður Reykjavíkur og örugglega áhugamaður um skipulagsþróun hennar en á þetta þarf að horfa út frá ýmsu öðru, ekki bara út frá hagsmunum borgarinnar, getum við sagt, hvar þessi starfsemi byggist upp heldur líka auðvitað kostnaðinn. Það liggur fyrir að þó að Listaháskólinn sé sjálfseignarstofnun hangir þessi framkvæmd að sjálfsögðu á fjármunum.
Ég er ekki að ímynda mér miðað við stöðu mála að það verði svigrúm á næstunni til að fara í framkvæmdir við Listaháskólann. Ég vil ítreka það líka í fyrirspurninni en mér finnst mikilvægt að við fáum að heyra hvort þessi starfshópur hafi lokið störfum og hafi kostnaðarmat á þessum tveimur valkostum. Hefur hæstv. ráðherra einhverja framtíðarsýn um skólann, einhverja óskavalkosti miðað við þá stöðu sem er uppi og líka ekki miðað við þá stöðu? Hvar sæi hæstv. ráðherra þennan skóla fara best?
Virðulegi forseti. Ég þakka fyrirspyrjanda fyrir að hefja máls á þessu máli. Eins og fyrirspyrjanda, hv. þingmanni, er kunnugt var í tíð síðustu ríkisstjórnar, nánar tiltekið þann 10. maí 2013, skipaður starfshópur sá sem nefndur var hér til að bera saman kosti þess að byggja yfir skólann annars vegar á svokölluðum Sölvhólsgötureit og hins vegar á þeim stað þar sem hann er núna, í Laugarnesinu. Þeirri vinnu er ekki lokið. Forsendur þess að hægt sé að ljúka þeirri vinnu eins og stefnt var að hafa því miður ekki reynst vera til staðar. Í fyrsta lagi fylgdu engir fjármunir með vinnu hópsins en nú liggur fyrir að nákvæm kostnaðarúttekt mun kosta allt að 4 millj. kr. Það þarf að leysa þann þátt málsins.
Síðan liggur ekki neitt fyrir um að Stjórnarráðið gefi frá sér Sölvhólsgötureitinn. Það þarf því að skýra betur forsendur fyrir verkinu áður en haldið er áfram með það.
Mér er hins vegar ljóst að húsnæðismál skólans eru í ólestri og ég hef fullan hug á og vilja til þess að vinna að lausn þess máls með skólanum. Helst ætti slíkur skóli að vera þar sem hann getur auðgað mannlífið og sjálfur dafnað. Ég get tekið undir með hv. fyrirspyrjanda að það væri ágætt því nær sem hann væri miðborginni. Þá skiptir líka máli hvar og hvernig það rúmast inni í skipulagi borgarinnar.
Til ítrekunar liggja niðurstöður hópsins ekki fyrir en honum var einmitt falið að gera ítarlega kostnaðaráætlun fyrir Listaháskólann. Starfshópnum var falið að fjalla um málið á grundvelli mismunandi staðsetningar og skoða þrjá möguleika þar að lútandi. Í fyrsta lagi kom til greina að gera breytingar á núverandi húsnæði skólans á Laugarnesvegi 91 og byggja við húsnæðið, í öðru lagi að gera breytingar á núverandi húsnæði skólans á Sölvhólsgötu 13 og byggja við húsnæðið og í þriðja lagi að byggja nýtt húsnæði við skólann á Sölvhólsgötureitnum. Það er dýrt að gera þessa kostnaðaráætlun og eins hefur ekki verið fallið frá þessum áformum. Eins og ég lýsti áðan hvað varðar Stjórnarráðið skýrir þetta tvennt þá töf sem orðið hefur á starfi hópsins.
Við munum innan ráðuneytisins sjá hvað við getum gert til að starfshópurinn geti klárað og komið með niðurstöðu sem getur þá hjálpað okkur við að leggja mat á þetta. Þessar þrjár leiðir eru sem sagt uppi, þessir reitir, en ég get líka tekið undir með hv. þingmanni að það er kannski ekki raunhæft að ætla að það verði einhverjar stórstígar framfarir alveg á næstunni vegna stöðu ríkissjóðs. Það skiptir samt máli að við sjáum til lands í þessari vinnu til að hægt sé að undirbyggja stefnumótun hvað þetta varðar með góðum hætti.
Virðulegi forseti. Ég þakka hv. fyrirspyrjanda fyrir spurninguna og ráðherranum fyrir svörin. Ég held að þetta mál hafi allt of lengi verið óleyst. Ég held að ein 20 ár hafi liðið án þess að húsnæðismálum Listaháskólans væri sæmilega fyrir komið. Ég hef af því áhyggjur að það hafi dregist svo mjög vegna ákveðins óraunsæis um hvað væri mögulegt í stöðunni og held að menn eigi að skoða alvarlega hvort styðjast megi við þá aðstöðu sem skólinn fékk í upphafi með breytingum þar á. Sú aðstaða er býsna nærri miðborg Reykjavíkur og getur gefið kost á mjög sveigjanlegum húsakynnum ef réttar breytingar eru þar gerðar. Að minnsta kosti þurfa menn að varast þær stóru skýjaborgir sem menn byggðu í (Forseti hringir.) aðdraganda hrunsins og urðu aldrei að neinu og hafa skilið skólann eftir í sama vanda og áður var.
Virðulegi forseti. Ég þakka hæstv. ráðherra svörin og hv. þingmanni hans innlegg. Það kom fram í svari hæstv. ráðherra að starfshópurinn hefði ekki lokið vinnu sinni og að nákvæm kostnaðarúttekt kostaði 4 milljónir. Það lá ekki fyrir í upphafi. Ég spyr þá: Sér hæstv. ráðherra einhverja leið til að ljúka því máli og hvenær þá?
Síðan hjó ég líka eftir því að hann sagði að ekkert lægi fyrir um að Stjórnarráðið gæfi frá sér Sölvhólsgötureitinn. Það er stefnubreyting því að sá starfshópur sem hér um ræðir var stofnaður með ríkisstjórnarsamþykkt á sínum tíma. Að honum koma, eins og ég sagði áðan, ríki, Reykjavíkurborg og Listaháskólinn sjálfur. Fyrir lá að þessi staðsetning yrði þar undir, þ.e. að Sölvhólsgötureiturinn yrði skoðaður. Þar af leiðandi lá væntanlega fyrir ákveðin stefna, hún hefði ekki verið skoðuð nema menn væru reiðubúnir að horfa þar á uppbyggingu listaháskóla. Er orðin einhver stefnubreyting þar á og er hæstv. ráðherra kunnugt um að margir hafi talið að þarna væri jafnvel rými fyrir báða aðila, þ.e. nýbyggingu af hálfu Stjórnarráðsins og Listaháskólans? Hvernig telur hann þá að sú framkvæmd gengi? Yrði það ekki skapandi Stjórnarráð sem kæmi út úr því? Mig langar aðeins að átta mig á því.
Hæstv. ráðherra fór hér yfir að hann hefði mikinn hug á að ljúka þessari vinnu. Hver er afstaða hæstv. ráðherra til staðsetningar? Hefur hann skoðun á henni? Hv. þm. Helgi Hjörvar nefndi að líklega væri hagkvæmara að horfa til þess húsnæðis sem fyrir er í Laugarnesinu en menn hafa hins vegar verið með efasemdir um það húsnæði, talið það óhentugt, enda byggt sem sláturhús, og að það gæti jafnvel orðið dýrari framkvæmdin á endanum. Væntanlega er það ástæðan fyrir þessari nákvæmu kostnaðarúttekt sem hæstv. ráðherra nefndi hér. Hefur ráðherra einhverja persónulega skoðun á því hvað hann sér fyrir sér um framtíð þessa skóla?
Virðulegi forseti. Ber að skilja það svo að þá hafi verið bókað með afgerandi hætti af hálfu ríkisstjórnar að búið væri að taka ákvörðun um að gefa Sölvhólsgötureitinn frá sér fyrir stjórnarráðsbygginguna? Ég er ekki viss um að svo sé. Aftur á móti er allt annað mál að það sé skoðað hvernig þessir möguleikar gætu litið út áður en við komumst að slíkri ákvörðun. Það er þó ekki sjálfgefið að slík ákvörðun yrði tekin jafnvel þótt það kæmi vel út fyrir Listaháskólann að þarna yrði byggt. Ég vil bara undirstrika það. Það er þá sérstök ákvörðun í sjálfu sér.
Hvað varðar sambúð Listaháskólans við Stjórnarráðið væri það áhugaverð og athyglisverð nálgun. Ég veit ekki hversu gott Listaháskólinn hefði af því en ég er nokkuð klár á því og viss um að Stjórnarráðið hefði mjög gott af því.
Hvað varðar persónulega afstöðu mína vil ég frekar bíða eftir því að fá niðurstöðu þessarar vinnu til að leggja grunn að slíkri skoðun. Vandinn er sá að vinna fór af stað án þess að til hennar hefði verið ætlað fjármagn. Síðan stöndum við frammi fyrir því að það kostar einar 4 milljónir að fá fram kostnaðarmat eins og talið er þurfa til að geta rökstutt niðurstöðu í þessu máli. Þá þarf að reyna að afla þeirra fjármuna, væntanlega í gegnum fjárlög. Ég sé ekki aðra leið til að gera það. Það hefði verið heppilegt ef við hefðum séð fyrir þegar ákvörðun um nefndina var tekin að til þessara útgjalda mundi koma.
Það er ekki hægt að sjá allt fyrir en þessi staða er uppi og þessi er kostnaðurinn og hann er sannarlega töluvert hár.