Virðulegi forseti. Ég þakka hv. þingmanni fyrirspurnina. Þrátt fyrir að ekki séu skráðar upplýsingar, eins og fram kemur í svarinu sem hv. þingmaður vitnaði til, þá eru þær aðferðir sem hér eru notaðar sambærilegar við þær sem til að mynda eru notaðar í Noregi. Til þess að sannreyna að nákvæmlega eins aðstæður séu uppi hér og þar var einmitt það verkefni sem hv. þingmaður vitnaði til sett á laggirnar og ég hef ekki aðrar upplýsingar en þær að til standi að vinna það í sumar, ég vænti þess. Ef það frestast af einhverjum óljósum ástæðum sem ég þekki ekki til núna, ég veit ekki til annars en að þetta verði gert, þá skal ég koma þeim upplýsingum til hv. þingmanns.

Þessar veiðar okkar eru gerðar með eins mannúðlegum hætti og hægt er, ólíkt margs konar öðru hvaladrápi þar sem ýmsar stórþjóðir hafa til að mynda verið að veiða alls konar hvalategundir sem meðafla og þeim er síðan hent. Það er auðvitað ekki sjálfbærni, það er ekki gert á mannúðlegan hátt þar sem hvalirnir drepast í netum túnfiskveiðimanna og annarra.

Þessar veiðar okkar eru gerðar eins mannúðlega og hægt er og mér finnst mjög gott að það skuli vera mjög ríkur vilji hjá Íslendingum og að það skuli vera skoðun þeirra að hvalir skuli veiddir á eins mannúðlegan hátt og hægt er eins og aðrar skepnur sem við aflífum til þess að búa til mat fyrir mannkynið.

Virðulegi forseti. Ég þakka hæstv. ráðherra svarið. Það má eflaust deila um hversu mannúðlegt dráp á hvölum er. Um er að ræða mjög flóknar lífverur, þ.e. spendýr með flókið taugakerfi sem finna sársauka og hafa í raun tilfinningar á líkum skala og við. Þetta eru alla vega mjög flóknar lífverur taugalífeðlisfræðilega séð sem kveljast vafalítið nokkuð. Miðað við þær aðferðir sem ég hef séð og þar sem ég vann nú í sláturhúsi Kaupfélagsins í gamla daga þá er það nú ekki sambærilegt að slátra nauti eða svíni eða hval. Þetta eru nokkuð aðrar aðferðir og má búast við nokkuð meiri sársauka.

Ég vil þá spyrja í framhaldinu: Verða þessar upplýsingar aðilanna birtar opinberlega svo almenningur geti kynnt sér þær og í framhaldinu lagt mat á hvort aðferðirnar séu mannúðlegar eða ekki? Telur ráðherra kannski eðlilegt að fjölmiðlum verði boðið í þessar ferðir þar sem úttektaraðilar verða til staðar til að upplýsa almenning betur um hvernig hvalveiðarnar fara fram?

Virðulegi forseti. Það er alveg rétt að í hinum vestræna heimi leggjum við mikla áherslu á að þær skepnur sem við slátrum séu aflífaðar á mannúðlegan hátt. Það er auðvitað ekki gert alls staðar í öllum heimshlutum samkvæmt öðrum trúarbrögðum, þá eru notaðar aðrar aðferðir sem við höfum ekki sætt okkur við í hinum vestræna heimi og höfum þar af leiðandi ekki leyft þær hér á Íslandi.

Þær upplýsingar sem koma munu út úr þessum leiðangri verða án efa aðgengilegar, til þess er þetta gert. Verið er að safna upplýsingunum í opinberum tilgangi og því verða þær gerðar aðgengilegar og menn upplýstir um málið sem það vilja, þannig að ég tel að það sé nú bara nokkuð augljóst. Ég vonast til að af þessu verkefni verði, ég veit ekki annað en að svo verði og það hefur staðið til í nokkuð langan tíma. Menn hafa verið að reyna að tryggja fjármagn til þess að það geti orðið. Það þarf auðvitað að kaupa þessa sérfræðinga að, en ég ítreka að þær aðferðir sem hér eru notaðar eru þær sömu og notaðar eru til að mynda í Noregi og hafa verið viðurkenndar sem mannúðlegar aðferðir.