hagræðing í heilbrigðisþjónustu.
Virðulegur forseti. Eins og hér hefur komið fram er krónan að veikjast, atvinnuleysið að aukast og efnahagslíf landsins stendur mjög veikt. Þetta er grafalvarleg staða og alveg ljóst að við þurfum að koma efnahagslífinu í gang. Við framsóknarmenn höfum talað þar um róttæka aðgerð, 20% leiðréttingu á skuldum bæði húsnæðislána og til fyrirtækja, á meðan núverandi ríkisstjórnarflokkar hafa verið í hálfgerðum smáskammtalækningum, því miður.
Það þarf líka að hagræða í ríkisrekstri. Það er ljóst að heilbrigðisþjónustan og menntakerfið taka um 60% af útgjöldum ríkisins og við þurfum að hagræða um 50 milljarða í næstu fjárlögum árið 2010, 50 milljarða aftur 2011 og 2012, 150 milljarða á næstu þremur árum. Þessi hagræðing hlýtur að koma við heilbrigðisþjónustuna.
Núna erum við komin fram í apríl og ljóst að rammar ráðuneyta hljóta að vera orðnir nokkuð skýrir. Því er mjög mikilvægt að þegar hagrætt er innan heilbrigðisþjónustunnar sé það ekki gert þannig að grunnþjónustan bíði varanlegan skaða vegna þess að þegar hagur vænkast á ný er mjög mikilvægt að við getum strax aukið þjónustuna aftur.
Við hæstv. heilbrigðisráðherra höfum á fyrri tíð rætt saman um t.d. tilvísanakerfi að danskri fyrirmynd sem gæti líklega sparað um 500 milljarða kr. eða upp undir það á ári án þess að þjónustan mundi skerðast. Því spyr ég hæstv. heilbrigðisráðherra: Er heilbrigðisráðherra búinn að undirbúa hvað gerist eftir kosningar? Það líður að kosningum. Ég geri mér grein fyrir því að hæstv. ráðherra getur ekki núna tekið pólitískar ákvarðanir um hvernig eigi að hagræða innan heilbrigðisþjónustunnar en það væri óábyrgt að undirbúa ekki neitt. Því vil ég gjarnan spyrja hæstv. heilbrigðisráðherra: Þarf Alþingi að koma saman á sumarþingi strax eftir kosningar (Forseti hringir.) til að taka ákvarðanir (Forseti hringir.) svo unnt sé að hagræða í heilbrigðisþjónustunni eins og við neyðumst til að gera?
Hæstv. forseti. Það er komið undir kjósendum þessa lands hvert framhald verður á því ríkisstjórnarsamstarfi sem stofnað hefur verið til. Það liggur í loftinu, finnst mörgum, að þarna á verði framhald enda komnar yfirlýsingar frá báðum stjórnarflokkunum um að hugur þeirra standi til slíks en við hljótum að bíða úrslita kosninganna, að sjálfsögðu, hvað þetta snertir.
Það er alveg rétt hjá hv. þingmanni að við þurfum að vanda til verka þegar fjárlög næsta árs eru annars vegar. Fyrir dyrum stendur umtalsverður niðurskurður í ríkisútgjöldum. Það er jafnframt ljóst að við þann niðurskurð þurfum við að forgangsraða og þá þannig að þeirri þjónustu sem viðkvæmust er verði hlíft. Við höfum ráðist í umtalsverðan niðurskurð í heilbrigðiskerfinu, sem nemur 6,7 milljörðum kr. á þessu ári. Þetta hefur kallað á mikið samstarf innan heilbrigðisþjónustunnar og það er gott til þess að hugsa hve vel starfsfólk almennt og stjórnendur heilbrigðisstofnana hafa tekið í þau mál og lagst saman á árarnar. Það þarf að verða framhald á þeirri samvinnu.
Það er rétt hjá hv. þingmanni að við þurfum að hugsa fram í tímann og hún nefnir sérstaklega tilvísanakerfi sem gæti orðið til þess að koma böndum á ríkisútgjöldin í heilbrigðisþjónustunni. Við megum hins vegar ekki flana þar að neinu. Það á ekki að taka nein (Forseti hringir.) heljarstökk í heilbrigðiskerfinu. Við þurfum að vera (Forseti hringir.) búin að undirbúa jarðveginn og framar öllu öðru (Forseti hringir.) að sjá til þess að um kerfisbreytingar (Forseti hringir.) ríki víðtæk sátt í heilbrigðiskerfinu.
Virðulegur forseti. Það er alveg rétt að það veltur á kjósendum hvernig kosningarnar fara. Ég verð að segja eins og er að staðan sem við horfum framan í núna hræðir mig að vissu leyti. Það er vegna þess að vinstri flokkarnir mælast með það mikið fylgi að hér gæti orðið hrein vinstri stjórn að afloknum kosningum. Og vinstri sporin hræða. (Gripið fram í: Nú?)
Ég held að það væri skynsamlegt að meiri jarðtenging væri í þeirri ríkisstjórn en nú er af því að það hefur valdið okkur framsóknarmönnum miklum vonbrigðum hvað ríkisstjórnin hefur lítið komið til móts við fyrirtækin og heimilin í landinu. Þetta eru smáskammtalækningar sem ríkisstjórnin hefur stundað og sú tillaga sem við höfum komið fram með í okkar efnahagstillögum um 20% leiðréttingu á skuldum bæði fyrirtækja og heimila er róttæk tillaga sem verður að fara í. Sporin hræða.
Virðulegur forseti. Ég fagna því (Forseti hringir.) að hæstv. heilbrigðisráðherra heldur því enn þá (Forseti hringir.) opnu að fara í tilvísanakerfi að danskri (Forseti hringir.) fyrirmynd af því að það er alveg ljóst að það verður að hagræða. Það verður að (Forseti hringir.) koma efnahagslífinu af stað og það verður líka að hagræða.
Hæstv. forseti. Það hefur komið fram í máli mínu, bæði á Alþingi og utan þingsins, að ég er hlynntur því að við stefnum að því að taka upp valfrjálst stýrikerfi, tilvísanakerfi eins og hv. þingmaður víkur hér að. Það er viðfangsefni komandi mánaða og missira að búa í haginn fyrir slíka kerfisbreytingu.
Síðan er hitt, af því að vikið var að sporum sem hræða og öðrum sem hræða síður, ég hef fylgst með mikilli velþóknun með þeirri endurnýjun sem á sér stað innan Framsóknarflokksins. Þar tel ég að séu að verða jákvæðar áherslubreytingar vegna þess að það sem hræðir kannski mest af öllu eru sporin sem stigin voru af gömlu Framsókn. Muna menn eftir S-hópnum? Ég ætla að láta (Forseti hringir.) upptalningunni lokið.