fólk í fjárhagsvandræðum vegna lánsveða.
Virðulegi forseti. Við þurfum ekki að hafa mörg orð um að meðal þeirra vandamála sem við höfum staðið frammi fyrir er að lán hafa stökkbreyst og hækkað hjá almenningi á sama tíma og laun hafa lækkað. Það hefur verið pólitísk samstaða um að koma til móts við fólk í skuldavanda.
Einn hópur hefur hins vegar algerlega orðið út undan, sá hópur sem hefur fengið lánsveð. Til dæmis stendur því fólki ekki til boða 110%-leiðin sem mikið hefur verið bent á.
Í gærkvöldi var í fréttum Stöðvar 2 kynnt aðstaða stórrar barnafjölskyldu sem hefur lent í því að lánin hafa hækkað mjög mikið og launin lækkað en sú fjölskylda hefur ekki tækifæri á úrlausn vegna þess að ef um lánsveð er að ræða er ekki tekið tillit til þess.
Virðulegi forseti. Ég spyr hæstv. forsætisráðherra, verkstjórann í ríkisstjórninni, að tvennu, í fyrsta lagi hvort hæstv. ráðherra finnist þetta eðlilegt og réttlátt. Finnst henni rétt og eðlilegt að ekki sé komið til móts við þennan hóp fólks? Í öðru lagi, ef hæstv. ráðherra finnst það ekki eðlilegt, hvað ætlar hæstv. ráðherra þá að gera í málinu og hvenær?
Virðulegi forseti. Ég get tekið undir með hv. þingmanni, mér finnst þetta hvorki réttlátt né eðlilegt. Þetta er einmitt sá þáttur sem við fórum mikið í gegnum þegar við fórum í síðustu aðgerðir með lánastofnunum og öðrum fyrir skuldug heimili, þessi lánsveð og hvernig hægt væri að taka á þeim. Þessi mál hafa reyndar verið rædd fyrir löngu í þingsal, t.d. varðandi lög um ábyrgðarmenn þar sem ég held að hafi verið fullur vilji fyrir því að undanskilja það að hægt væri að ganga að heimilum þeirra sem gengjust í ábyrgð. Það náðist ekki samkomulag um þetta við meðal annars bankana og þeir báru fyrir sig að um væri að ræða vernduð eignarréttindi sem ekki væri hægt að ganga að. Finni þingmaðurinn einhverja leið til að hægt sé að taka á þessu máli er ég meira en fús til að setjast yfir hana með honum.
Virðulegi forseti. Ég vil byrja á að þakka hæstv. forsætisráðherra fyrir hreinskilið svar. Í fljótu bragði man ég ekki eftir jafnhreinskilnu svari hjá hæstv. forsætisráðherra. Það er þó ekki útilokað að það hafi verið einhvern tímann. Hæstv. forsætisráðherra lýsti því yfir að hún hefði ekki nein tök á málinu en óskaði í leiðinni eftir því að við ynnum í því saman.
Skuldamálin eru í fullkomnum ógöngum. Út af fyrirspurn minni um umboðsmann skuldara um daginn frétti ég að á tíu mánuðum væri búið að afgreiða 22 mál af 2.800. Það segir allt sem segja þarf. Ég er 1. flutningsmaður að frumvarpi sem gengur út á að einfalda ferlið og ég lít svo á að nú ætli hæstv. forsætisráðherra í fullri alvöru að leggja við hlustir þegar við hv. þingmenn stjórnarandstöðunnar komum fram með hugmyndir. Fram til þessa hefur ekki verið neinn samningsvilji hvað það varðar og að sjálfsögðu (Forseti hringir.) skulum við setjast saman yfir þetta mál. Ég hlakka til að eiga gott samstarf við hæstv. forsætisráðherra um skuldamál heimilanna, bankamálin, efnahagsmálin og annað sem virkilega (Forseti hringir.) brennur á. Ég fagna þessum tóni og það hvarflar ekki að mér, virðulegi forseti, eina stutta stund (Forseti hringir.) að þetta sé innantómt tal. Það er örugglega innstæða fyrir þessu.
Forseti minnir hv. þingmann á að virða tímamörk í ræðustól Alþingis.
Ég ítreka bara, virðulegi forseti, að ef við finnum færar leiðir í þessu efni er sjálfsagt að skoða þær. Hv. þingmaður nefndi greiðsluaðlögunina. Hér hefur ítrekað verið talað um að einungis sé búið að afgreiða 22 mál, en greiðsluferlið er alveg í samræmi við það sem Alþingi samþykkti í þessu máli. 2.800 eða 2.900 umsóknir hafa komið og það er búið að afgreiða frá umboðsmanni 800, en það tekur þrjá til fimm mánuði eftir að umboðsmaður hefur afgreitt málið að samþykkja þennan rétt. Það þarf að auglýsa, það þarf að fara af stað með kröfulýsingu, það þarf að semja við kröfuhafa o.s.frv. og það tekur þennan tíma. Ferlið í þessu máli er ekkert lengra en það. Vissulega vildum við hafa það hraðara en þetta tekur tíma. Eftir síðasta febrúarmánuð var aukið verulega við mannafla hjá umboðsmanni skuldara og hraðinn hefur aukist verulega. Hjá embættinu hafa verið afgreidd 200–300 mál á mánuði en jafnvel þó að umboðsmaður sé búinn að afgreiða mál tekur það þennan tíma. Þó að umboðsmaður segi að viðkomandi hafi þennan rétt þarf málið samt að fara í gegnum þessa kröfulýsingu sem tekur óhjákvæmilega þennan tíma. Það er allt gert sem hægt er til að hraða þessum málum þannig að það að halda því fram að bara 22 mál hafi verið afgreidd segir ekki allt um heildarmyndina.