túlkasjóður.
Hæstv. forseti. Enn og aftur berast okkur fréttir af því að félagslegi túlkasjóðurinn sé tómur og ekki verði úthlutað úr honum næst fyrr en 1. júlí. Þetta eru vondar fréttir fyrir alla sem vilja búa í samfélagi þar sem það er sameiginlegt markmið að gefa fólki eins jöfn tækifæri og mögulegt er. En þetta eru þó alveg sérstaklega vondar fréttir fyrir þá sem vegna heyrnarskerðingar eða af öðrum ástæðum þurfa á þeirri þjónustu að halda sem félagslegi túlkasjóðurinn greiðir fyrir því að ef ekki er úthlutað úr sjóðnum fer það fólk á mis við tækifæri til að taka þátt í leik og starfi og leggja sitt af mörkum. Við þær aðstæður er einnig augljóst að mikil hætta er á að fólki verði mismunað um þessa mikilvægu þjónustu á grundvelli efnahags. Mismunun um svo veigamikla hagsmuni er að sjálfsögðu ekki bara ámælisverð, heldur fer hún í bága við mannréttindasamninga sem banna mismunun fólks.
Ég vil einnig í þessu sambandi minna á að margáréttað er í samningi Sameinuðu þjóðanna um réttindi fatlaðs fólks að stjórnvöldum ber að gera það sem þau geta til þess að tryggja fötluðu fólki tækifæri til jafns við aðra til þátttöku og virkni í samfélaginu án mismununar og án aðgreiningar.
Við framkvæmd samningsins er gert ráð fyrir miklu samráði við það fólk sem samningurinn nær til. Það ætti ekki að þurfa að taka fram sérstaklega, en því miður sýna dæmin annað. Við skipulag þessarar þjónustu verður að vera náið samráð hlutaðeigandi stjórnvalda við þá sem þjónustuna nýta þannig að hún mæti þörfum þeirra eins vel og mögulegt er. Sé það ekki gert kemur það niður á gæðum þjónustunnar og þannig er illa farið með almannafé.
Ég vil því spyrja hæstv. mennta- og menningarmálaráðherra hvaða ráðagerðir hann hefur uppi um að styrkja félagslega túlkasjóðinn þannig að mögulegt verði að veita þá þjónustu sem hann tryggir allt árið. Og hvernig hafa stjórnvöld staðið að samráði við notendur þeirrar þjónustu sem sjóðurinn styrkir og fjallað um tillögur þeirra?
Virðulegi forseti. Ég þakka hv. þingmanni fyrirspurnina og vil byrja á því að segja að þetta mál á sér nokkra forsögu. Í tíð síðustu ríkisstjórnar var tekin sú ákvörðun að hækka laun þeirra sem starfa að túlkaþjónustunni allverulega og má vel færa rök fyrir þeirri ákvörðun, en það láðist hjá sömu ríkisstjórn að tryggja það að fjármagn fylgdi þeirri ákvörðun. (Gripið fram í: Þú ert búinn að hafa tvö ár til að …) Síðan var í tíð þessarar ríkisstjórnar gripið til þeirra ráðstafana að leiðrétta það og stóraukið var við fjármagn til sjóðsins til að hann gæti þá borgað hærri laun og er núna í þeirri stöðu að veita þjónustu í jafn margar klukkustundir og var áður fyrir þá hækkun sem var ófjármögnuð af síðustu ríkisstjórn. Þannig hefur núverandi stjórnarmeirihluti brugðist við þessu máli. Tel ég að það sé mun betra verklag en það sem var hjá síðustu ríkisstjórn.
Virðulegi forseti. Hafandi mætt þessu með því að auka framlög til sjóðsins er alveg ljóst að það er áfram meiri eftirspurn eftir þessari þjónustu en fjármagn er til. Búið er að taka þá ákvörðun í samráði við sjóðinn að til að koma í veg fyrir að þurrð verði um mitt tímabil, eins og hefur verið eða að hausti eins og var í fyrra, verði reynt að jafna útgjöld í sjóðnum yfir tímann eða yfir árið þannig að sú staða komi ekki upp.
Í þessum málum eins og svo mörgum öðrum sem snúa að okkar félagsþjónustu væri vitanlega alveg hægt að sjá fyrir sér meiri fjármuni, vissulega, virðulegi forseti, og er þetta ekki eini staðurinn þar sem sú staða er uppi. Það er sjálfsagt mál að við höldum áfram að vinna að þeim þáttum. Það er sjálfsagt mál að við höldum áfram að vinna að því hvernig við getum sem best tryggt stöðu sjóðsins. En ég vil líka minna hv. fyrirspyrjanda á það að umtalsvert starf er unnið í skólakerfi landsins þegar kemur að túlkaþjónustu (Gripið fram í.) (Forseti hringir.) sem fellur undir mitt ráðuneyti og er starfsemi (Forseti hringir.) sem fer fram í skólum landsins. En (Forseti hringir.) það er ekki svo, virðulegi forseti, að þetta sé eina þjónustan sem er veitt í gegnum þennan sjóð, það er umtalsvert mikil þjónusta sem veitt er vegna þessara mála.
Hæstv. forseti. Ég þakka hæstv. mennta- og menningarmálaráðherra svörin. Ég var svo sem alveg búinn að gera mér augljóst fyrir fram hvernig þau yrðu, hann svaraði ekki spurningum mínum.
Ég vil leyfa mér að árétta að þetta mál snýst ekki um ölmusu eða manngæsku og eiginlega ekki um pólitík heldur. Hér er um mannréttindi að ræða, tækifæri til að taka þátt í samfélaginu án mismununar og leggja sitt af mörkum. Þar eru grundvallarlífsgæði fólks í húfi.
Ég vil líka í þessu sambandi leyfa mér að minna hæstv. ráðherra og okkur öll hér inni á lög nr. 61/2011, um stöðu íslenskrar tungu og íslensks táknmáls, sem voru akkúrat fjögurra ára í fyrradag, og þær skyldur sem á íslenskum stjórnvöldum hvíla samkvæmt þeim lögum til að hlúa að íslensku táknmáli og að óheimilt sé að mismuna mönnum eftir því hvaða mál þeir nota.
Ég vil því hvetja hæstv. mennta- og menningarmálaráðherra og raunar alla ríkisstjórnina og okkur hér inni til að reka af okkur þetta slyðruorð og gera það sem gera þarf til að reka megi þennan mikilvæga túlkasjóð þannig að sómi verði að. Annað er skammarlegt. Er ekki hæstv. ráðherra sammála mér um það?
Virðulegi forseti. Ég held að við séum öll sammála hv. þingmanni hvað það varðar að bæði í þessu máli og svo fjölmörgum öðrum sem snúa að þeim möguleikum sem fólk hefur til að taka þátt í þjóðlífinu og stendur frammi fyrir skertum möguleikum, þá erum við auðvitað öll sammála um það að við viljum gera sem mest og best til að tryggja þá þátttöku. Það er víða pottur brotinn í samfélagi okkar hvað það varðar. Þetta er ekki eini staðurinn eða eina verkefnið sem við stöndum frammi fyrir.
Ég ítreka að nú þegar er um að ræða verulega þjónustu í skólakerfinu þar sem verið er að veita túlkaþjónustu. Það er þess vegna rangt sem stundum er haldið fram að þetta sé eini staðurinn sem slík þjónusta er veitt, en vitanlega er þetta önnur þjónusta og önnur tegund. Ég vil bara árétta þetta. Svo vil ég segja, virðulegi forseti, að menn geta borið saman fjárframlög sem núverandi stjórnarmeirihluti hefur veitt til þessa málaflokks og þau fjárframlög sem voru á síðasta kjörtímabili.