úttekt á kostnaði vegna skerðinga aldraðra og öryrkja.
Virðulegi forseti. Þann 20. júní 2019, fyrir tæpu ári, hlupum við hér á milli herbergja til þess að komast að samkomulagi, eins og við kölluðum það. Það gerist nú gjarnan fyrir jólafrí og sumarfrí að þá fær stjórnarandstaðan einhverja samningsstöðu gagnvart ríkisstjórninni og fær að taka eitthvert mál úr nefnd til að koma með það hér inn í 2. umr. og jafnvel atkvæðagreiðslu.
Í þessu tilviki er um að ræða fyrsta þingmannamál Flokks fólksins, sem ég mælti fyrir hér strax fyrir jólin 2017 og endaði í þingsályktun, með samþykki allra flokka, 20. júní í fyrra. Þingsályktunin var um úttekt á fjárhagslegum áhrifum þess fyrir ríkissjóð að afnema skerðingar ellilífeyrisþega almannatrygginga vegna launatekna.
Hæstv. ráðherra samþykkti að gerð yrði úttekt af óháðum aðilum í samstarfi við félagsmálaráðuneytið við mat á fjárhagslegum áhrifum, hvort það kostaði ríkissjóð einhverja fjármuni að afnema þessar skerðingar á launatekjur aldraðra, en við höfðum tvívegis lagt fram útreikninga þar að lútandi sem við höfum keypt af færum fagaðilum úti í bæ, sem sögðu að þvert á móti á hagnaður myndi verða af því að veita eldri borgurum möguleika á því að halda áfram að vinna án skerðinga.
Nú vil ég spyrja hæstv. ráðherra, sem hét því í umræddri þingsályktun, að fyrir 1. mars 2020 myndi hann koma hér fram með það algjörlega á hreinu hvort einhver kostnaður hlytist af því eða ekki. Ef ekki ætlaði hann að koma með frumvarp sem myndi leiða til þess að þessar skerðingar af launatekjum aldraðra yrðu afnumdar. Ég spyr því hæstv. ráðherra: Hvað er að frétta?
Virðulegi forseti. Ég þakka hv. þm. Ingu Sæland fyrir þessa fyrirspurn. Það er rétt að við þinglok fórum við hér á milli herbergja, eins og gjarnan gerist við lok þings, og úr varð þingsályktunartillaga sem var samþykkt lítils háttar breytt, sem Flokkur fólksins hafði lagt til, sem fól í sér að félags- og barnamálaráðherra var falið að vinna þessa umræddu úttekt. Samið var við Capacent um að vinna úttektina, gerður samningur um það. Það dróst lítils háttar en þeir hafa nú skilað úttektinni. Niðurstaða hennar var sú að umtalsverður kostnaður væri af þessu fyrir ríkissjóð. Ég á von á því að úttektin geti farið á vef ráðuneytisins á allra næstu dögum ef hún er ekki þegar komin þangað. Það var líka kveðið á um það í þingsályktunartillögunni, sem samþykkt var af öllum þingmönnum, að væri kostnaðarauki samkvæmt þessari óháðu úttekt — ég ítreka að hún var unnin af Capacent — skyldi úttektinni vísað til sérstaks starfshóps sem er nú að ræða stöðu og kjör eldri borgara og hefur úttektin verið send þangað. Ég biðst forláts á því ef hún hefur ekki verið birt opinberlega og mun ganga úr skugga um það eftir þessa fyrirspurn að hún fari beint á vef ráðuneytisins, ef hún er ekki þegar komin þangað, og biðja um að hún verði líka send hv. þingmanni í tölvupósti.
Virðulegi forseti. Ég þakka hæstv. ráðherra fyrir svarið. Það er sem sagt dálítið mikið að frétta þó að ég hafi í rauninni alveg misst af því, hæstv. ráðherra, því að það var líka samkomulag hjá okkur, sem ég vona að hæstv. ráðherra muni eins og nákvæmlega þetta, að ef þessi úttekt sýndi fram á að það væri kostnaður fyrir ríkissjóð að afnema þessar skerðingar þá átti að mynda stýrihóp og hann bauð mér sérstaklega að vera þátttakandi í honum. Ég hef í rauninni ekki frétt neitt fyrr en núna og mér þykir það miður. Ég er afskaplega ósátt við það ef ég á að segja eins og er. Ég óska eftir því að hæstv. ráðherra standi við samkomulag okkar frá A til Ö og ég treysti því að hann geri það.
Virðulegi forseti. Ég verð að segja að ég er mjög ánægður með að þessi úttekt skyldi þó skila sér, þó að mánaðarfrestun eða eitthvað slíkt hafi orðið á verkefninu vegna þess að flestöll verkefni sem við höfum verið að vinna að, önnur en þau sem tengjast Covid, hafa því miður verið sett á ís og hafa frestast síðustu mánuði vegna þess ástands og þeirra afleiðinga sem Covid hefur haft. Þannig að þrátt fyrir að þessi úttekt sé að skila sér eilítið seinna en ráðgert var í umræddri þingsályktun erum við engu að síður ótrúlega stutt frá því.
Ég held síðan að það væri heppilegast að ég og hv. þingmaður tækjum tal saman að loknum þessum óundirbúna fyrirspurnatíma og myndum reyna að verða við því að hv. þingmaður taki sæti í þeim starfshóp sem þegar er starfandi. Hann var ekki myndaður sérstaklega utan um þetta heldur er starfandi starfshópur sem er að fara yfir kjör aldraðra og hugur minn stóð til að vísa málinu til þess starfshóps vegna þess að það kom fram í þingsályktuninni. Ég held að hv. þingmaður gæti þá bara tekið sæti í þeim hópi (Forseti hringir.) eða við getum átt samtal um það.