fé til að útrýma sárafátækt.
Virðulegur forseti. Hvar á að fá peningana til að útrýma sárafátækt hjá þeim fáu sem lifa við hana? Að þessu spurði hæstv. fjármálaráðherra mig þegar ég spurði hann hvers vegna hann hjálpaði ekki þeim fáu sem hann telur að lifi við sárafátækt á Íslandi. Já, hvar eigum við að fá peningana til þess? Yfir 2 milljarðar hafa verið greiddir í viðspyrnustyrki. Þá hafa verið greiddir um 9 milljarðar kr. í tekjufallsstyrki og 2,3 milljarðar í lokunarstyrki. Síðustu mánuði hafa 80 milljarðar verið greiddir í fjölbreyttan stuðning og úrræði ríkisstjórnarinnar vegna faraldursins að frátaldri heimild til útgreiðslu séreignarsparnaðar. 7.000 störf, 472.000 kr. á mánuði plús lífeyrissjóður og síðast en ekki síst fimm daga sóttkví á fjögurra stjörnu lúxushóteli fyrir ferðamenn með fæði. Þegar þessi útgjöld voru ákveðin, kom þá hæstv. fjármálaráðherra upp í ræðupúlt og spurði: Hvar í ósköpunum eigum við að fá peninga til þess að gera þetta? Ég minnist þess ekki.
Þess vegna spyr ég hæstv. fjármálaráðherra: Er ekki hægt að ná í þessa peninga á nákvæmlega sama stað og hann tók hina? Eða er ekki hægt að redda þeim örfáu sem hann telur að lifi í sárafátækt á Íslandi? Gera það a.m.k. í Covid-faraldri, a.m.k. fram yfir kosningar eins og þetta átak um 7.000 störf á að gilda og þá verður fólkið sennilega sett út á guð og gaddinn. En það hlýtur að vera hægt að setja líka inn í þetta þessa örfáu sem lifa við sárafátækt á Íslandi.
Virðulegi forseti. Það eru of margir sem ná ekki endum saman í íslensku samfélagi, það er alveg hárrétt hjá hv. þingmanni. En við höfum verið að styðja betur við bakið á þessum hópum og við höfum gert það með ýmsum hætti. Við getum nefnt sem dæmi 4 milljarða kr. sem við í þessari ríkisstjórn tókum sérstaklega til hliðar í þeim tilgangi á þessu kjörtímabili. Við höfum hækkað um næstum því helming stuðning úr almannatryggingakerfinu á undanförnum tæpum áratug og kaupmáttur bóta hefur aldrei verið hærri en í dag, aldrei. Við höfum aldrei áður varið jafn háum fjárhæðum í þessa málaflokka.
Hv. þingmaður spyr hvort við hefðum kannski — ég skildi hann þannig að við hefðum mögulega átt að nota peningana sem fóru í aðgerðir í þetta frekar eða sækja þá á sama stað. Við tókum lán. Við teljum að með því að gera það séum við að bjarga verðmætum. Ég held að horfa verði til þess að við erum að reka ríkissjóð með geigvænlegum halla og hugmyndir um að afnema allar tekjutengingar, svo að dæmi sé tekið, kosta tugi milljarða. En vandinn er til staðar og ég segi að svarið við þessu undirliggjandi máli, sem hv. þingmaður rekur hér, sé að halda áfram að skapa mikil verðmæti. Kraftmikið atvinnulíf á Íslandi er forsenda þess að við getum stoppað í götin í velferðarkerfinu.
Virðulegur forseti. Ég þakka hæstv. fjármálaráðherra svörin. Bjarga verðmætum, 4 milljarðar, dropi í hafið. Einstætt foreldri sagði við mig nýlega: Hafragrautur á morgnana og hafragrautur seinni partinn eftir 15. hvers mánaðar. Þá er peningurinn búinn og þá hefur viðkomandi, eftir leigugreiðslur og önnur útgjöld, ekki efni á öðru fæði. Viðkomandi sagði að um helgar væri líka hafragrautur en þá væru hafðir með þurrkaðir ávextir, rúsínur og annað, og kanill til að fá tilbreytingu og lúxus. Getum við ekki boðið þessum einstaklingi og fleirum fimm daga dvöl á hóteli og fæði? Við gerum það með ferðamenn og erum ekki að bjarga verðmætum þar. Ég get ekki séð að ferðamenn sem koma til að skoða gosið á Reykjanesi séu að bjarga verðmætum, það er kostnaður. (Forseti hringir.) Þar af leiðandi hlýtur að vera hægt að bjóða þessum einstaklingum að fá a.m.k. fimm daga á hótelherbergi og fæði (Forseti hringir.) en best væri að gera það líkt og með störfin 7.000, fram yfir kosningar.
Virðulegi forseti. Það er alltaf dálítið snúið að taka einstök dæmi eins og hv. þingmaður nefnir. Maður vill skilja hvað er á bak við. Maður vill skilja hverjar tekjurnar eru, hverjir tekjustraumarnir eru, hvort viðkomandi sé virkur á atvinnumarkaði eða ekki. En ég get nefnt eitt dæmi hér; að fyrir einstætt foreldri með tvö börn þá hafa breytingar á barnabótum í tíð þessarar ríkisstjórnar styrkt stöðu einstæðs foreldris með 300.000 kr. í tekjur á mánuði um meira en 100.000 kr. á ári. Það eru 100.000 kr. viðbótarbarnabætur á ári bara vegna breytinganna sem við í þessari ríkisstjórn höfum verið að gera. Þetta skiptir máli. Ef hv. þingmaður vill mæla það í hafragrautsskálum eru þetta margar hafragrautsskálar.