um fundarstjórn.
beiðni um fund í utanríkismálanefnd.
beiðni um fund í utanríkismálanefnd.
Frú forseti. Ég tel mikilvægt að utanríkismálanefnd komi saman við fyrsta tækifæri í ljósi þess sem kom fram í fyrirspurnatíma áðan vegna þess að í gær var tekin ákvörðun í Norður-Atlantshafsráðinu um að NATO yfirtæki stjórn mála í Líbíu. Hér kemur forsvarsmaður annars stjórnarflokksins og segist ekki hafa haft upplýsingar um málið, að málið hafi ekkert verið rætt í ríkisstjórn. Það skiptir miklu máli, eins og fram kom í þessum fyrirspurnatíma, að það liggi fyrir hvernig staðið var að ákvarðanatöku um ráðstöfun á atkvæði Íslendinga í ráðinu og að það sé engum vafa undirorpið, sérstaklega nú eftir að ákvörðunin hefur verið tekin, um það hver (Forseti hringir.) stuðningur er við málið frá íslenskum stjórnvöldum. Með því að kalla saman fund í utanríkismálanefnd gætum við fengið um þetta nánari upplýsingar (Forseti hringir.) en það sætir mikilli furðu, frú forseti, að um þetta mál (Forseti hringir.) skuli ekki hafa verið rætt í ríkisstjórn og að annar stjórnarflokkurinn virðist ekki upplýstur um það. (BirgJ: Heyr, heyr.)
Forseti. Ég tek undir með hv. þm. Bjarna Benediktssyni og kalla líka eftir fundi í utanríkismálanefnd. Ég hef reyndar áður, fyrir rúmlega viku, kallað eftir fundi þar sem ég óskaði eftir að utanríkisráðherra yrði kallaður fyrir fundinn til að fara yfir þessi mál þegar ljóst var hvert stefndi. Það hefur ekki verið orðið við því þannig að ég ítreka þessar óskir og vona að formaður nefndarinnar verði við þeim og það verði boðað til fundar í dag til þess að fá svör við þeim fyrirspurnum sem komu fram í máli hv. þm. Bjarna Benediktssonar.
Frú forseti. Það er sjálfsagt að verða við ósk um að boða til fundar í utanríkismálanefnd, ég mun reyna að gera ráðstafanir til þess að það geti orðið í dag. Það væri að vísu heppilegt að hæstv. utanríkisráðherra gæti verið á þeim fundi en mér er kunnugt um að hann er nú á leið úr landi. (Gripið fram í.) Ég mun kanna hver gegnir embætti fyrir hann á meðan og reyna að verða við þeirri beiðni þannig að hægt sé að halda fund síðar í dag eða í kvöld.