Kristinn H. Gunnarsson
:
Virðulegi forseti. Það er nauðsynlegt að svara hæstv. ráðherra fyrst hann fór út í efnislega umræðu undir liðnum þingsköp. Það er jafnljóst að í frv. sem ráðherrann hefur hér lagt fram er framsalið, framsal valdsins til ráðherrans, svo víðtækt að engu tali tekur og það er í hendi ráðherrans hversu langt hann teygir sig með reglugerðarsetningu. Í mínum huga er enginn vafi á því að þessi heimild er svo rúm að hún muni fela í sér að ráðherra getur með reglugerðarheimildinni sett hömlur á atvinnufrelsi manna.
