[18:10]
Ingibjörg Pálmadóttir :
Virðulegi forseti. Við fulltrúar stjórnarandstöðunnar í heilbr.- og trn. gerum það að tillögu okkar að þeim hluta frv. sem ekki snýr að samningnum um Evrópska efnahagssvæðið verði vísað til ríkisstjórnarinnar. Við teljum að þær breytingar sem boðaðar eru í frv. muni ekki lækka lyfjaverð í landinu eins og markmiðið er með frv., enda engin rök komið fram sem hníga í þá átt. Þvert á móti muni lyfjaverð á landsbyggðinni verða mun hærra en á Stór-Reykjavíkursvæðinu.
Það er ekki hægt að sætta sig við að lyfjaverð sé mismunandi eftir búsetu. Ef stórverslanir á Reykjavíkursvæðinu hefja póstverslun með lyf, sem er líklegt ef frv. verður að lögum, er grundvöllur fyrir litlu apótekunum úti á landi brostinn og þar með öryggi þeirra stefnt í tvísýnu sem á bráðalyfjum þurfa að halda. Hér er verið að slaka á kröfum um jafna uppbyggingu heilbrigðisþjónustunnar og það viljum við ekki samþykkja. Ég segi já við frávísunartillögunni.
