[01:23]
Heilbrigðisráðherra (Sighvatur Björgvinsson) :
Virðulegi forseti. Í frv. til laga um breytingu á lögum um brunatryggingu, nr. 48/1994, eins og það er eftir 2. umr., segir svo í 1. gr. staflið a, með leyfi forseta:
,,Á eftir 2. málslið 1. gr. komi nýr málsliður svohljóðandi:
Þó skal Fasteignamat ríkisins að jafnaði annast fyrstu virðingu.``
Ég lít svo á að með þessu ákvæði sé Fasteignamati ríkisins heimilt að semja við þriðja aðila um að annast slíka virðingargerð í sínu nafni enda sé virðingargerðin unnin í fullu samræmi við lög um brunatryggingu og samkvæmt reglum sem Fasteignamat ríkisins setur enda valdi það húseiganda og/eða vátryggingafélagi engum umframkostnaði.
Við samningu reglugerðar á grundvelli laganna mun ég gæta þess að ofangreint sjónarmið verði virt.
Virðulegi forseti. Þessa yfirlýsingu vil ég láta koma fram við þessa umræðu.