[prenta uppsett í dálka] 85. fundur
[14:08]
Fyrirspyrjandi (Ögmundur Jónasson):
Hæstv. forseti. Ég þakka hæstv. ráðherra fyrir svörin. Nú er það svo að ég hef enga sérstarka ást á skýrslum og skýrslugerð yfirleitt. Skýrslur gera menn hins vegar til þess að kanna ástand mála og síðan framkvæma í samræmi við það.
Það kom fram í máli hæstv. ráðherra að þessum framkvæmdum hefur miðað mjög hægt og víða er pottur brotinn og mörgu áfátt í reglugerðum og lögum og ég fagna því sem fram kom í hans máli að það eigi að gera bragarbót á. Ég tel nauðsynlegt að gerð verði mjög rækileg og ítarleg úttekt á aðgengi í öllum stofnunum ríkis og sveitarfélaga á vegum ríkisstjórnarinnar með tilliti til þarfa fatlaðra og mun ég leggja fram tillögu til þingsályktunar þess efnis. Markmið slíkrar úttektar verður að fá fram óyggjandi upplýsingar um stöðu þessara mála. Á grundvelli upplýsinga sem þar koma fram ætti að vera hægt að gera framkvæmda- og kostnaðaráætlun um úrbætur svo vinna megi markvisst að því að gera allar byggingar ríkis og sveitarfélaga aðgengilegar öllum Íslendingum.
