Einar Oddur Kristjánsson (andsvar):
Herra forseti. Fyrri spurningin var hvort ég mundi styðja tillögu frá Þjóðvaka upp á 20% eignaraðild í fiskvinnslu eða tillögu félaga minna upp á 49% eignaraðild í fiskvinnslu. Ég hef sagt það fyrr við þessa umræðu, herra forseti, að ég hefði hugleitt það og væri þeirrar skoðunar að gagnvart fiskvinnslunni sjálfri, þar sem fyrirtækin eiga enga hlutdeild í auðlindinni, þá kæmi hvaða prósentutala sem er til greina, jafnvel 100%.
Síðan var spurt hvernig ég sæi fyrir mér framkæmdina á aðskilnaði veiða og vinnslu. Eins og ég hef áður sagt get ég ekki séð muninn á iðnfyrirtæki í rekstri á Íslandi og íslensku fiskvinnslufyrirtæki sem á fortakslaust enga aflaheimild. Ef það á enga aflaheimild sé ég engan mun á því og almennu iðnfyrirtæki við þær rekstraraðstæður sem við búum við í dag, þ.e. frjálsa verðmyndun á fiski.