Össur Skarphéðinsson (andsvar):
Herra forseti. Mér varð einu sinni hált á því að gera greind eins af þingmönnum Sjálfstfl. að umræðuefni úr þessum ræðustól og ætla ekki að gera það aftur í dag enda er hv. þm. Árni Johnsen ekki í salnum. Hins vegar var það svo að það kom fram andstaða, ekki við hlutafélagaformið heldur við frv., sem byggðist á 8. gr. Það var alveg skýrt í ræðu hv. þm. Guðmundar Árna Stefánssonar að hann var algjörlega andstæður meðferðinni á réttindum starfsmannanna. Ég held að það sé ekki hægt að svara þessu með öðrum hætti. Ég mun síðan ef þörf krefur aðstoða hv. þm. Árna M. Mathiesen við lestur á ræðu hv. þm. Guðmundar Árna Stefánssonar og mætti jafnvel kalla til liðsauka ef það dugar ekki.