Svavar Gestsson (andsvar):
Hæstv. forseti. Þetta mál snýst um það að þegar verið er að setja lög eins og mannanafnalög þá þurfa þau stjórnvöld, sem koma að málinu, að vera með í vinnunni og ef þeim finnst þau ekki vera með þá geta það verið full rök. Ég las tilvitnanir í bréf Hagstofunnar áðan og ég ætla að bæta annarri tilvitnun við, hæstv. forseti:
,,Þá má geta þess að margvísleg gögn eru fyrirliggjandi á Hagstofunni um notkun manna á lögunum frá 1991. Er miður hversu lítið frumvarpshöfundar hafa nýtt sér þau við samningu frv. og til athugana á mannanafnahegðun og mannanafnahefðum.``
Ég segi alveg eins og er, hæstv. forseti. Mér finnst þetta dálítið alvarleg ábending.