Guðný Guðbjörnsdóttir:
Virðulegi forseti. Ég vil taka undir orð þingflokksformanns Alþfl., hv. þm. Rannveigar Guðmundsdóttur um hvað óviðunandi er hvernig málsmeðferð þingmannamála er í þinginu. Það eru ekki bara eitt eða tvö mál sem við kvennalistakonur lögðum fram á réttum tíma og hafa ekki fengist rædd. Vil ég þar sérstaklega nefna tillögu til þingsályktunar um kynferðislega áreitni sem með mjög miklum erfiðismunum tókst að fá rædda utan dagskrár í vetur. Síðan var lögð fram formleg tillaga og hún hefur beðið afgreiðslu. Við höfum sett hana á oddinn og hún hefur ekki fengist rædd.
Ég hef haldið að það væri nokkuð skýr ávísun á að mál væru rædd ef þau eru tekin út úr nefnd bæði með meiri- og minnihlutaáliti. Síðast í gær gerðist það að frv. um breytingu á lögum um laun forseta Íslands var tekið út úr allshn. bæði með meirihluta- og minnihlutaáliti en það var ekki ljóst í gærkvöldi hvort það mál fengist rætt í dag þrátt fyrir ítrekaða ósk mína. Mér finnst þetta algerlega óviðunandi og vona að það verði breyting til batnaðar á næsta Alþingi.