[prenta uppsett í dálka]
Flm. (Hjörleifur Guttormsson) (andsvar):
Virðulegur forseti. Hæstv. ráðherra er kannski farinn að átta sig á því að hann hafi lagt helst til mikið inn í þetta mál í upphafsræðu sinni og er nú í síðari ræðu að reyna að draga í land og gerast hinn föðurlegi aðili sem ætlar að tryggja hið endanlega réttlæti ef aðilar vinnumarkaðarins geta ekki komið sér saman. Það er sá svipur sem hann vill nú hafa á máli sínu. Ég virði það út af fyrir sig hæstv. ráðherra til betri vegar að hann skuli þó reyna að draga með vissum hætti í land frá sinni fyrri eindregnu afstöðu þar sem hann lagði öll sín lóð á atvinnurekendavogarskálina í þessu máli. Nú gerir hann mikið úr því að einn vel verki farinn starfsmaður hans ráðuneytis sé að störfum í nefnd og muni leitast við að tryggja hið endanlega réttlæti í þessum efnum. Við eigum að bíða eftir því.
Ég, virðulegur forseti, hef mikla trú á góðum embættismönnum. En ég held að meira skipti þó að þeir sem eiga að ráða ferðinni séu rétt þenkjandi og hlaupi ekki inn í mál með þeim hætti sem hæstv. félmrh. gerði hér í fyrri ræðu sinni varðandi þetta mál. Ég er því ekki sérlega bjartsýnn eftir síðari ræðu ráðherrans þó hann reyndi að breiða yfir orðin frá hinni fyrri.
