[prenta uppsett í dálka] 91. fundur
Samgönguráðherra (Halldór Blöndal):
Herra forseti. Með þessu frv. er lagt til að þeim nemendum sem hófu nám fyrir gildistöku laga nr. 62/1995, um breytingu á lögum um atvinnuréttindi skipstjórnarmanna á íslenskum skipum, sé heimilt að ljúka námi samkvæmt eldri lögum, enda útskrifist þeir eigi síðar en fimm árum eftir að námið hófst.
Í 16. gr. laga nr. 112/1984 er kveðið á um að þeir sem hafi öðlast rétt til atvinnu við siglingar á íslenskum skipum áður en lögin tóku gildi skuli halda þeim réttindum sínum óskertum.
Þetta gildir hins vegar ekki um þá sem höfðu hafið nám í gildistíð eldri laga. Staðan gagnvart þeim er sú að nemendur sem voru í Stýrimannaskólanum fyrir gildistöku laganna nr. 62/1995 útskrifuðust samkvæmt nýju lögunum. Með þeim lögum var réttindum skipstjórnarmanna breytt til samræmis við alþjóðlegar reglur og veitir nám í Stýrimannaskólanum önnur réttindi samkvæmt nýju lögunum en hinum eldri lögum. Eðlilegt er að ný lög hafi ekki íþyngjandi áhrif á þá sem hófu nám í trausti þess að fá réttindi á grundvelli eldri laga. Tilgangur frv. er sá að einn að tryggja rétt þessara nemenda.
Hæstv. forseti. Ég legg til að málinu verði vísað til 2. umr. og samgn.
