Heilbrigðisráðherra (Ingibjörg Pálmadóttir):
Virðulegi forseti. Í morgun lagði ég fram frv. til laga í ríkisstjórn þess eðlis að breyta almannatryggingalögunum þannig að hægt sé að endurgreiða sjúklingum það hlutfall sem þeir hafa hingað til fengið greitt frá almannatryggingum þegar samningar nást við sérfræðilækna. Ég á því von á að þetta frv. liggi hér í þingsölum innan nokkurra daga.
Þetta held ég að hljóti að svara spurningu þingmannsins. Hv. þm. spurði einnig hvort sjúklingar þeirra lækna sem ekki færu á samning hjá Tryggingastofnun fengju endurgreitt. Sjúklingar þeirra lækna geta ekki fengið endurgreitt, eingöngu sjúklingar þeirra sem eru á samningi við Tryggingastofnun.