Dómsmálaráðherra (Þorsteinn Pálsson) (andsvar):
Herra forseti. Ég vil vekja athygli hv. þm. á því að hv. þm. jafnaðarmanna hafa í þessari umræðu keppst við, hver á fætur öðrum, að lýsa því yfir að enginn þeirra hafi sakað mig um brot í starfi. Svo kemur hv. þm. og segir að aðalmálið og öll umræðan af hálfu Alþfl. snúist um ávirðingar í minn garð. Nú er eitthvað nýtt komið upp í þessu og ég skora á þingmenn jafnaðarmanna að skjóta á fundi og ræða þetta. Þessar yfirlýsingar ganga hver í sína áttina. Ég hygg að þeim væri það afskaplega hollt að halda smáfund og koma sér saman um það hver hafi verið kjarninn í þeirra málflutningi hér í dag.