Kristinn H. Gunnarsson (andsvar):
Herra forseti. Margt var skynsamlegt í máli hv. þm. eins og oft áður, sérstaklega þar sem hann benti réttilega á að verið væri í lausn málsins að búa til tvær ríkisstofnanir. Það hefur oft áður þótt nauðsynlegt að búa til nýja ríkisstofnun í sambandi við sjávarútveg og er skýrasta dæmið um það svonefnd Fiskistofa, sem var ekki stór í sniðum þegar hún var stofnuð og sagt að hún yrði aldrei mjög stór. En viti menn, á fáeinum árum hefur hún blásið út þannig að starfsmenn eru á annað hundrað. Hún er staðsett í Reykjavík.
Ég er eiginlega alveg viss um að ef Fiskistofa hefði verið staðsett utan höfuðborgarsvæðisins, t.d. á Akureyri, þá væri hún ekki með á annað hundrað manns, hún væri kannski með 20--30 manns. Það er nefnilega mjög gott ráð fyrir þá sem vilja aðhald og sparnað í ríkisbúskapnum að staðsetja nýjar ríkisstofnanir úti á landi.
Ég vil beina fyrirspurn til hv. þm. Péturs Blöndals: Mun hann styðja tillögu mína um að þær tvær nýju ríkisstofnanir, ef Alþingi samþykkir að koma þeim á laggirnar, verði staðsettar utan höfuðborgarsvæðisins? Ég hef að vísu ákveðinn stað í huga en ég ljóstra því ekki upp að sinni.