Gunnlaugur M. Sigmundsson (andsvar):
Herra forseti. Ég get alveg tekið undir það með hv. þm. sem var í andsvari að það er langeðlilegast að útgerð og sjómenn leysi það sín á milli hvernig skip eru mönnuð. En ég trúi því ekki að tækniframfarir hafi ekki áhrif á það hvaða þörf sé fyrir mannskap á skipum. Við vitum, þar sem ég nefndi norska loðnuflotann, að mjög miklar tækniframfarir hafa orðið hjá þeim. Það hafa líka orðið miklar tækniframfarir í okkar flota án þess að ástæða hafi þótt til að fækka í mannskap á þeim skipum. Ég vil tengja þetta saman, þ.e. að tækniframfarir munu létta mönnum mjög starfið og hafa gert það og það þýðir þá líka að menn eiga að geta fækkað í mannskap á skipunum.