[prenta uppsett í dálka] 23. fundur
Viðskiptaráðherra (Finnur Ingólfsson):
Herra forseti. Á þskj. 223 spyr hv. þm. Tómas Ingi Olrich: Hefur ráðherra upplýsingar um markaðshlutdeild þriggja stærstu fyrirtækja landsins í bankastarfsemi?
Samkvæmt rekstrarreikningi viðskiptabanka og sparisjóða frá árinu 1996 var markaðshlutdeild þriggja stærstu fyrirtækjanna sem hér segir:
Landsbanki Íslands 35%, Íslandsbanki hf. 26% og Búnaðarbanki Íslands 18%. Markaðshlutdeild er mæld út frá vaxtatekjum og öðrum tekjum í samstæðureikningi fyrirtækjanna.
Í öðru lagi spyr hv. þm.: Telur ráðherra ástæðu til, með tilliti til markaðshlutdeildar þessara fyrirtækja, að setja lög sem takmarka umsvif og starfsemi fyrirtækja í bankastarfsemi umfram það sem samkeppnislög segja til um?
Sem svar við þeirri spurningu, herra forseti, vísa ég til svars míns við annarri fyrirspurn á þskj. 230 sem er efnislega samhljóða svari við því sem hér er spurt um.
