Tómas Ingi Olrich (andsvar):
Herra forseti. Ég held að það varpi einna bestu ljósi á það hve fullyrðing hv. þm. um tilgang orkusáttmála Evrópu eða hve skilningur hans er í raun og veru takmarkaður að gassölufyrirtæki í Vestur-Evrópu óttast fátt eins mikið og hvaða áhrif orkusamningur Evrópu muni hafa á gasiðnaðinn í Vestur-Evrópu og þau fyrirtæki sem þar starfa vegna þess hve rússneska fyrirtækið Gasprom hefur yfirgnæfandi sterka stöðu á þessum markaði ef tekst að búa til heildarorkumarkað fyrir Evrópuríkin. Hagsmunir Vestur-Evrópuríkjanna eru því ekki eins augljósir á öllum sviðum þessa samnings og hv. þm. vildi vera láta.