[prenta uppsett í dálka] 28. fundur
Fyrirspyrjandi (Guðni Ágústsson):
Hæstv. forseti. Með tilkomu virkjana í Þjórsá og Tungnaá á undanförnum árum er ljóst að vetrarrennsli Þjórsár í byggð hefur aukist verulega. Það er viðhorf margra hlutaðeigandi landeigenda á bökkum Þjórsár að landbrot hafi aukist og þá sérstaklega að vetrarlagi. Þá myndast oft ísstíflur og Þjórsá bólgnar upp og flæmist þá gjarnan út úr farvegi sínum. Hætta á landskemmdum vex því við aukið rennsli.
Heilt bæjarhverfi á vesturbakka Þjórsár býr nú við vaxandi ógn af völdum Þjórsár. Það sannaði flóð í fyrravetur. Mér sýnist brýnt að hækka veginn og styrkja að Egilsstöðum og Egilsstaðakoti. Enn fremur verði að gera leiðigarð sem beinir Þjórsá frá vesturbakkanum og bæjunum í Mjósundi, Forsæti og Ferjunesi.
Því er ekki að leyna að eftir að þetta vatnsrennsli jókst brýtur Þjórsá víðar land, svo sem á Skeiðum og auðvitað er það svo sem betur fer að Landsvirkjun hefur tekið þátt í varnaraðgerðum gegnum tíðina. En ég hef áhyggjur af því sem bæði er að gerast á hálendinu og því aukna vatnsmagni sem stefnt er á að fari um farveginn og að af því stafi hætta. Því vil ég vekja athygli á þessu máli og gera kröfu um að þeir sem að málinu koma verði leiddir saman og mörkuð verði stefna.
Ég hef því leyft mér að spyrja hæstv. landbrh. eftirfarandi spurninga:
Er til heildarúttekt á landbroti af völdum Þjórsár síðan virkjanir hófust?
Hefur Landsvirkjun kostað aðgerðir til varnar landbroti við Þjórsá?
Hvaða aðgerðir eru fyrirhugaðar á næstu árum til að koma í veg fyrir frekara landbrot á bökkum Þjórsár í byggð og til að fyrirbyggja að Þjórsá flæmist að vetri um byggð í Villingaholtshreppi, eins og ég gat um áður?
