[prenta uppsett í dálka] 42. fundur
Jóhanna Sigurðardóttir:
Herra forseti. Þegar húsaleigubótakerfið fór af stað var samkomulag um að ríkissjóður legði fram 400 millj. kr. Nú er áformað að framlög ríkisins verði 280 millj. kr. á næsta ári. Þó er verið að skylda öll sveitarfélög til að greiða húsaleigubætur auk þess sem stefnt er að því að færa leigu í félagslegum íbúðum eða leiguíbúðum upp í raunkostnað en greiða þess í stað húsaleigubætur. Við þessa breytingu þurfa sveitarfélögin að leggja fram verulegar fjárhæðir umfram greiðslu húsaleigubóta til að leigjendur verði jafnsettir á eftir. Verði það ekki gert getur leiga hækkað um allt að 20 þús. kr. hjá þeim sem búa í leiguíbúðum sveitarfélaga. Það framlag ríkisins sem hér er verið að greiða atkvæði um tryggir ekki að leigjendur verði jafnsettir og áður. Ég greiði ekki atkvæði.
