Steingrímur J. Sigfússon:
Herra forseti. Með ákvæðum c-liðar 1. gr. frv. er verið að halda út á þá braut í þorskaflahámarkshópi smábátaflotans að innleiða frjálst framsal á hámarkinu, að vísu innan hópsins, en til viðbótar því er heimiluð leiga á veiðiheimildum innan ársins allt að 30% af þorskaflahámarki hvers krókabáts. Við í minni hlutanum höfum lýst miklum efasemdum um þá braut sem þarna er verið að halda út á, að innleiða í raun og veru kvótakerfi með viðskiptum, náskyldum þeim sem eiga sér stað í almenna aflamarkskerfinu, fyrir þennan hluta flotans einnig. Við teljum að það hefði a.m.k. þurft að huga miklu betur að því hvernig að slíku væri staðið og erum í grundvallaratriðum, a.m.k. sá sem hér talar, andvígir því að leiguviðskipti af þessu tagi séu yfir höfuð ástunduð í fiskveiðistjórnarkerfinu. Það á að sjálfsögðu við um þennan hluta flotans eins og aðra þó að í takmörkuðum mæli sé. Ég greiði því atkvæði gegn þessu ákvæði.