Guðjón Guðmundsson:
Herra forseti. Í dag afgreiðir Alþingi hallalaus fjárlög annað árið í röð. Slíkt hefur ekki gerst í háa herrans tíð. Á sama tíma er verið að stórlækka skatta. Tekjuskatturinn lækkar um 3 prósentustig á árinu 1997 og 1998 auk þess sem skattleysismörk verða hækkuð.
Stjórnarandstaðan hefur lagt fram urmul af breytingartillögum við fjárlagafrv. og lagt til aukin ríkisútgjöld upp á milljarða kr. og að á móti verði skattar hækkaðir. Ég er algjörlega ósammála þessum skattahækkunartillögum stjórnarandstöðunnar og mun því greiða atkvæði gegn öllum breytingartillögum vinstri flokkanna en að sjálfsögðu með frv. í heild.