Svanfríður Jónasdóttir (andsvar):
Herra forseti. Ég nefndi landshlutaleikhús vegna þess að ráðherrann sýndi af sér nokkurn ótta ef hlutskipti hans yrði að setja fram leiklistarlög þar sem boðið væri upp á eitthvað sem ekki væri jafnræði. Ég benti honum á þessa leið, hún er greiðfarin ef hann óttast að ekki verði um jafnræði að ræða ef byggðasjónarmiðum er sinnt. Ég mun auðvitað tala fyrir þessari leið áfram í hv. nefnd. Ég vænti þess að þegar hæstv. menntmrh. hefur íhugað málið nánar sjái hann að jafnræði getur falist í öðru en því að allir séu eins. Stundum felst jafnræðið einmitt í því að fá að vera svolítið öðruvísi.