Frsm. meiri hluta heilbr.- og trn. (Siv Friðleifsdóttir) (andsvar):
Virðulegur forseti. Ég er ekki viss um að ég komist yfir að svara öllu þessu í stuttu andsvari. Um persónuverndina hefur komið mjög skýrt fram í yfirferð heilbrn. að persónuverndin er trygg. Við höfum fengið gögn um það bæði frá Lagastofnun, Skýrsluvélum ríkisins og fleiri aðilum.
Um tölvunefnd og hlutverk hennar vil ég sérstaklega taka fram að frv. sem hv. þm. vitnaði í áðan er ekki beint tengt við þetta frv. sem við fjöllum um hér vegna þess að þar er um tilskipun frá Evrópusambandinu að ræða sem við munum sjálfsagt færa í lög óháð þessu gagnagrunnsfrv. Það er reyndar ekki orðið þingskjal og ekki komið frá þingflokki en tölvunefnd verður að sjálfsögðu í miklu hlutverki eins og fram kemur í frv. þar sem væntanlegur starfsleyfishafi á að greiða fyrir eftirlit tölvunefndar. Að sjálfsögðu verður tölvunefnd mjög öflug til þess að geta sinnt því eftirliti sem kveðið er á um í lögunum.