Gísli S. Einarsson:
Herra forseti. Samkvæmt fyrirliggjandi upplýsingum á að keyra inn í gagnagrunnsfrv. erfða- og ættfræðiupplýsingar um einstaklinga án samþykkis tölvunefndar í hverju tilviki. Ég lýsti því yfir að ég mundi styðja gagnagrunnsfrv. óbreytt eins og það var lagt fram í haust. Eftir þeim upplýsingum sem ég hef og eins og ég sé þetta fyrir mér, þá er málið mjög breytt. Það gjörbreytir minni afstöðu. Ég skora á hæstv. heilbrrh. að beita sér fyrir því að umræða um málið verði stöðvuð í bili, að kallaður verði saman fundur og þeim aðilum sem óskuðu eftir að ræða við hv. heilbr.- og trn. verði gefið tækifæri til að ræða málið. Ég legg til, herra forseti, að málinu verði frestað í einn dag. Þá gefst nægur tími til að afgreiða málið eftir það.