Einar K. Guðfinnsson:
Virðulegi forseti. Við fyrri umræðu þessa máls fór ég mjög ítarlega yfir efni þess, gerði grein fyrir afstöðu minni og gagnrýndi fjölmargt í frv. Ég tel að með þessari afgreiðslu sé hvorki verið að stíga gott skref né skynsamlegt. Við eigum eftir að horfast í augu við margs konar vandamál sem stafa af þessari lagasetningu.
Ég tel að með markmiðinu um vægi atkvæða hafi grundvellinum undan núverandi kjördæmaskipan í raun verið kollvarpað og því sé staðan sú eins og við blasir að við munum búa við stór víðfeðm kjördæmi sem komi í veg fyrir eðlilegt samband þingmanna og kjósenda. Pólitískur styrkur landsbyggðarinnar mun minnka og vægi og afl hagsmunahópa og þrýstihópa aukast. Þetta tel ég óskynsamlega leið og því segi ég nei.