Forseti (Halldór Blöndal):
Hinn 30. desember sl. barst svohljóðandi bréf:
,,Með bréfi þessu afsala ég mér þingmennsku frá og með næstu áramótum.
Ég árna Alþingi heilla í mikilvægum störfum og vænti góðs samstarfs við alþingismenn á öðrum starfsvettvangi. Jafnframt þakka ég ánægjulegt samstarf undangengin ár.
Finnur Ingólfsson, 12. þm. Reykv.``
Í stað Finns Ingólfssonar tekur nú sæti á Alþingi Jónína Bjartmarz. Hún verður 16. þm. Reykv. og samkvæmt venju breytist kosningatala þess þingmanns Framsfl. sem ofar er á listanum, þ.e. Ólafur Örn Haraldsson verður 12. þm. Reykv.
Kjörbréf Jónínu Bjartmarz hefur þegar verið rannsakað og samþykkt en hún hefur ekki áður tekið sæti á Alþingi og ber því að undirrita drengskaparheit að stjórnarskránni.